«Астананың» экс-футболшысы – Гамшиктің сөздері туралы: Словакия – орта деңгейлі құрама

«Астана» клубының және Молдова құрамасының бұрынғы шабуылшысы Игорь Бугаев ASnews.kz сайтына берген сұхбатында Словакия құрамасындағы бас бапкердің көмекшісі Марек Гамшиктің сөздеріне жауап қатты.

Бұған дейін Гамшик Ұлттар лигасында Қазақстан және Молдова бар топта өз командасының топ жаратынына сенімді екенін айтқан еді.

«Мен кезінде Гамшикке қарсы ойнағанмын. Ол – жақсы футболшы. Бірақ мұндай матчтарда бәрі дайындық пен психологиялық жағдайға байланысты. Менің бір жаттықтырушым болды – Чемпиондар лигасын да, Олимпиаданы да жеңген Игорь Иванович Добровольский. Ол бізге әрдайым өте қарапайым сөз айтатын:

– Жігіттер, бүгін Нидерланд құрамасына қарсы ойнаймыз, сендерді дайындаудың қажеті бар ма?

– Жоқ, қажет емес, Игорь Иванович.

Нәтиже үшін бізді ешкім жазғырмайды, бірақ егер жақсы нәтиже тіркесек, біз туралы бүкіл әлем айтады. Сондықтан құрамадағы жігіттер ақша үшін емес, абыройы, аты және жанкүйерлері үшін ойнап жатқанын түсінеді деп ойлаймын», – деді Бугаев.

Сондай-ақ ҚПЛ клубтарының экс-ойыншысы қазіргі Қазақстан үшін Словакия аса қауіпті қарсылас емес екенін атап өтті.

«Словакия – Франция немесе Германия сияқты алыптардың деңгейіндегі қарсылас емес. Бұл – орта деңгейлі құрама. Қазақстан жуырда Бельгиямен тең ойнады. Словактар әлсіз деп отырған жоқпын, бірақ қазір кез-келген қарсыласпен ойнауға болады.

Футболды жейдедегі фамилиялар ойнамайды, адамдар ойнайды. Осыны есте сақтаңыздар. Барлығы әр футболшының өзіне байланысты. Тек оларға не үшін ойнап жүргенін жеткізу керек. Бүкіл ел қарап, қолдап отыр», – деп түйіндеді Игорь.

УЕФА Ұлттар лигасының жеребесі қорытындысы бойынша Қазақстан құрамасы C3 тобына түсті. Талғат Байсуфинов шәкірттері В дивизионына жолдама алу үшін Словакия, Молдова және Фарер аралдарымен бәсекеге түседі.

Бұған дейін «Тобыл», «Астана» және «Ертіс» клубтарында ойнаған молдовалдық экс-футболшы да алдағы турнирдегі Қазақстанның мүмкіндігі жайлы пікір білдірген болатын.