ҚПЛ-дың молдовалық экс-шабуылшысы – Қазақстанның мүмкіндігі жайлы: Байсуфинов команданы алға жетелейді

Молдова құрамасының және ҚПЛ клубтарының бұрынғы шабуылшысы Игорь Бугаев ASnews.kz сайтына берген сұхбатында Қазақстан құрамасының Ұлттар лигасындағы мүмкіндіктерін бағалады.

«Бұл жерде бәрі менталитетке байланысты болады. Қазір Қазақстан буын алмасу кезеңінен өтіп жатыр деп ойлаймын, бұл ел үшін жаңа құбылыс. Клубтар жекеменшікке өтуде. Осы өзгерістерден кейін бәрі жақсы жаққа өзгереді деп үміттенемін.

Клубтарды иемденіп жатқан инвесторлар ірі трансферлер жасады – бұл футболдың танымалдығына ықпал етеді. Біз өмір сүруге үйреніп қалған батпақты орта қозғала бастады: мемлекет бюджеті мен бітпейтін наразылықтарға нүкте қойылады. Меніңше, жаңа бағытқа көшу процессті анағұрлым қызықты етеді», – деді Бугаев.

Сондай-ақ экс-шабуылшы ұлттық құраманың бас бапкері Талғат Байсуфиновке қолдау білдірді.

«QJ League сияқты жаңа турнирлер мен инвесторлардың келуі Қазақстанды психологиялық тұрғыдан да жоғарыға көтереді. Әрине, ұлттық құрама – бөлек әлем, бірақ болып жатқан барлық өзгерістер оған да оң әсерін тигізеді.

Кім не десе де, мен Қазақстанның мүмкіндігі бар деп ойлаймын. Ешкімнен қорықпай, өз бағытыңнан таймау керек. Талғат Байсуфинов сияқты бапкермен құрама дұрыс психологиялық жүйе қалыптастыра алады. Өзім ұлттық құрамада 60-тан астам матч өткіздім, сондықтан білемін: ол жерде ойыншыны арнайы жаттықтырудың қажеті жоқ, сен ел намысын қорғау үшін алаңға шығасың. Ең бастысы – физикалық дайындығың жеткілікті болуы керек», – деп түйіндеді Бугаев.

«Тобыл» сапында Бугаев 104 матч (25 гол, 10 нәтижелі пас), «Астана» («Локомотив») құрамында 64 матч (26 гол) өткізген. Сондай-ақ «Ертіс» клубында да өнер көрсеткен. Ол – Қазақстан Кубогы мен Суперкубогының иегері.

Ұлттар лигасының C3 тобында Қазақстан Фарер аралдары, Словакия және Молдова құрамаларымен күш сынасады.