Түркістан U-21 жастар құрамасының матчтарын қабылдайды

Қазақстанның U-21 жастар құрамасы Еуро-2027 іріктеу кезеңі аясындағы наурыз айындағы матчтарын Түркістанда өткізеді. Бұл туралы ASnews.kz арнайы тілшісіне Түркістан облысы әкімдігіндегі дереккөз мәлімдеді.

Жақында қалаға жергілікті инфрақұрылыммен танысу үшін Словакиядан арнайы делегация келді. Қарсылас команданың өкілдері стадион мен команда орналасатын бес жұлдызды қонақ үйді аралап көрді. Қонақтар шаһардың сұлулығы мен тазалығына тәнті болып, арена мен қонақ үй сапасына жоғары баға берді.

Жақын уақытта Түркістанға Ирландия делегациясы да келеді деп күтілуде. Қазақстан–Словакия матчы 27 наурызға жоспарланған. Ал Ирландия құрамасына қарсы ойын 31 наурыз күні Түркістанда өтуі әбден мүмкін.