Инсайдер – Чесноковтың Шотландия чемпионатындағы дебюті жайлы: шабуылда оған оңай болған жоқ

Шотландиялық The Scottish Sun басылымының шолушысы әрі инсайдері Роберт Мартин ASnews.kz сайтына берген сұхбатында қазақстандық Ислам Чесноковтың Шотландия чемпионатындағы «Хартс» сапындағы алғашқы ойынына қатысты пікір білдірді.

«Менің ойымша, ол жақсы ойнады. Шабуыл тұрғысынан оған оңай болған жоқ, дегенмен бірінші таймда бір жақсы мүмкіндігі болды.

Үзілістен кейін бапкер оны вингер позициясынан қапталдағы қорғаушы орнына ауыстырды. Ол командаға осы өте маңызды жеңіске жетуге көмектесу үшін аянбай тер төкті», – деп атап өтті журналист.

Еске салайық, вингер «Хибернианға» қарсы жеңісті дербиде (1:0) «Хартс» сапында негізгі құрамда алаңға шықты.

Осы жеңістің арқасында Чесноковтың клубы 57 ұпай жинап, турнир кестесіндегі көшбасшылығын сақтап қалды.