Әліп – Тоқаевпен болған кездесу жайлы: ол сурет қазір Ақтаудағы үйімде ілулі тұр

Қазақстан құрамасының капитаны Нұралы Әліп ASnews.kz сайтына берген сұхбатында 2023 жылы Солтүстік Ирландияны жеңгеннен кейін Мемлекет басшысы Қасым-Жомарт Тоқаевпен болған кездесуі туралы айтып берді.

Футболшы Президентпен суретке түскісі келгенін және сол кезде сәттіліктің арқасында жағдайдың солай өрбігенін мәлімдеді.

«Әрине, Президенттің стадионда болуы – біз үшін үлкен жауапкершілік. Ол матчта міндетті түрде жеңуіміз керек еді. Барлығы жоспар бойынша өтті. Ол кезде капитан Асхат Тағыберген болатын, сол себепті барлық ойыншылардың қолтаңбасы қойылған допты өзі табыстады.

Ал мен іштей: «Президентпен қалай суретке түссем екен?» деп ойлап тұрдым. Асхат допты бергеннен кейін оны қолынан түсіріп алып, доп маған қарай домалап келді. Бұл мен үшін таптырмас мүмкіндік болды. Әрине, қобалжу болды, өйткені ол бізден жасы үлкен адам ғой. Қолын алып, қатты қуандым», – деді Әліп.

Қорғаушы сол кештен қалған естелік суреттің қазір үйінде ілулі тұрғанын айтты. Сондай-ақ Президентке спортқа көрсетіп жатқан қолдауы үшін алғыс білдірді.

«Бұл сурет қазір Ақтаудағы үйімізде ілулі тұр. Оған шексіз алғысымды білдіремін. Ол футболдың дамуы үшін көп нәрсе жасап жатыр: жаңа стадиондар салынып жатыр, академиялар дамып келеді.

Футбол клубтары жекеменшікке өтіп жатыр. Бұл клубтар үшін де тиімді – бәсекелестік артады. Егер барлық клубтар жекеменшікке өтсе, бұл чемпионатымыз үшін пайдалы болады», – деп түйіндеді ойыншы.

Еуро-2024 іріктеу кезеңіндегі Солтүстік Ирландияға қарсы матч 2023 жылдың қыркүйегінде Астанада өтіп, Қазақстан құрамасы 1:0 есебімен жеңіске жетті. Ойыннан кейін Қасым-Жомарт Тоқаев киім ауыстыратын бөлмеде команданы жеке өзі құттықтаған еді.

Бұған дейін Әліп «Зенит» клубындағы алғашқы жылын еске алған болатын.