Семак – Әліптің рөлі туралы: «Зенитті» онсыз елестету қиын

«Зениттің» бас бапкері Сергей Семак ASnews.kz сайтына берген сұхбатында Қазақстан құрамасының капитаны Нұралы Әліптің прогресін жоғары бағалады.

Ресейлік маманның айтуынша, бапкерлер штабы қорғаушыны «Қайратта» жүрген кезінен бастап бақылаған.

«Оны «Зенитке» алмай тұрып, бұрынғы командасында ойнап жүргенде бақылап жүрдік. Әрине, оның прогресс жасауға негіз болатын жақсы тұстарын байқап қалдық. Ол – жылдам әрі табанды қорғаушы.

Оның осал тұстары да болды, бірақ уақыт өте келе, тәжірибе мен мықты ойыншылардың арасында жаттығу жасаудың арқасында бұл кемшіліктер жойылды. Дәл қазір ол командаға бейімделіп, клубтың айырылмас біртұтас бөлігіне айналды. Нұралысыз «Зенитті» елестету қиынға соғады», – деді Семак.

Нұралы Әліп «Зенитке» 2022 жылдың басында «Қайраттан» ауысқан болатын. Осы уақыт ішінде 26 жастағы қорғаушы Ресейдің үш дүркін чемпионы, Кубок иегері және үш мәрте ел Суперкубогының иегері атанды.