Шотландиялық эксперт – Кенжебектің «Ахматқа» ауысуы жайында: британ футболынан бас тартты

Шотландиялық сарапшы әрі The Courier Sport басылымының журналисі Алан Темпл ASnews.kz сайтына берген сұхбатында Ғалымжан Кенжебектің «Ахматқа» ауысу мүмкіндігіне қатысты пікір білдірді.

«Кенжебектің қалай шешім қабылдағанын да, «Ахмат» клубын да жақсы білмеймін. Бірақ шотландиялықтар үшін футболшының «Дандиді» емес, басқа клубты таңдауы тосын жағдай емес. Бұл олардың көздеп отырған ойыншысы болғанымен, өзге клубтар әлдеқайда жоғары жалақы ұсынатыны анық. «Данди Юнайтед» Ғалымжанға британ футболына жол ашып бере алар еді, алайда ол басқа жолды таңдады», – деді Темпл.

Ресейлік БАҚ-тың хабарлауынша, «Елімайдың» бұрынғы вингері алдағы аптада Грозный клубына ауысу үшін медициналық тексерістен өтеді. Ал футболшының агенті бұл ақпаратқа қатысты пікір білдіруден бас тартты.

Бұған дейін Кенжебекке чехиялық «Виктория», грекиялық «Олимпиакосы», сондай-ақ шотландиялық «Хартс» пен «Данди Юнайтед» клубтары қызығушылық танытқан еді. Қазіргі таңда «Данди Юнайтед» Шотландия чемпионатының турнирлік кестесінде алтыншы орында тұр.