Жуков – Бельгия құрамасы жайлы: мен ойнағанда Троссар қосалқы құрамда отыратын

Қазақстан құрамасының жартылай қорғаушысы Георгий Жуков BorodAbata.kz сайтына берген сұхбатында жас кезінде бірге ойнаған мықты футболшыларды еске алды.

«Андерлехт» академиясында Ромелу Лукакудың інісі Джорданмен бірге ойнадым. Ал Ромелудың өзімен күнде бір автобуста қайтатынбыз. «Манчестер Юнайтедтің» болашағына баланған Аднан Янузай да бізбен бірге болды. Троссармен бірге жастар құрамасында (U-19) ойнадым. Мен «ондықтың» позициясында ойнайтын едім, ал Леандро қосалқы құрамда отыратын. Рас айтып тұрмын. Ол тура мен сияқты болды. Бойы да, салмағы да менікіндей еді. Тек жылдамдығы болмады. Соққысы, техникасы жаман емес тұғын. Бірақ қазір ол «Арсеналда» ойнайды. Кезінде бұл футболшыдан ешкім үміт күтпеді және қазіргідей топ-клубқа сатамыз деген ой ешкімнің ойына кіріп шықпады.

Давид Оригимен де «Ливерпульде» бірге ойнадым. Оның талант екені сол кезде көрініп тұрды. Мен бірге ойнаған футболшылар қазір «Брюгге», «Андерлехтте» жүр. Қазақстанда оларды көп тани бермейді.

Айтпақшы, сол кездері халықаралық турнирлерде көп ойнайтынбыз. Депай сондай жарыстарда жарқырып көрінетін еді. ПСВ, «Аякстың» жастары мықты болатын. Кезінде көп үміт күтпеген футболшылар қазір топ-клубтарда доп теуіп жүр.

1994 жылы Семей қаласында дүниеге келген Георгий Жуков 5 жасында ата-анасымен бірге Бельгияға көшіп, футболдағы алғашқы қадамдарын сол жақта жасады.

Қазақстан құрамасы ӘЧ-2026 іріктеу кезеңіндегі соңғы ойынын бүгін, 15 қараша күні «Астана Аренада» Бельгияға қарсы өткізеді.