Исламхан Сәтпаевтың «Челсиге» ауысуына баға берді: менде Англиядан ұсыныс болған емес

Қазақстан ұлттық құрамасының бұрынғы капитаны Бауыржан Исламхан ASnews.kz тілшісіне берген сұхбатында Дастан Сәтпаевтың Англияға ауысуына қатысты пікір білдірді.

Тәжірибелі футболшы өзінің жастық шағы мен 17 жастағы вундеркиндтің қазіргі жетістігін салыстыруға келмейтінін ашық айтты.

«Дастанмен салыстыру ма? Біріншіден, оны англиялық клуб сатып алып отыр. Менің ойымша, екеуміздің жастық шағымызды салыстыруға келмейді. Оның жасында менде Англиядан ұсыныс болған емес.

Дастан 17 жасында шетелге көшіп бара жатыр. Бұның артында қаншама еңбек пен тер жатыр. Ол бұл жерде тоқтап қалмайтынына сенімдімін. Бұл тек бастамасы болсын», – деді Исламхан.

Сондай-ақ, Бауыржан «Қайрат» сапында жүрген кезін еске алып, академия түлектерінің өсіп-жетілгеніне қуанышты екенін жеткізді.

«Мен «Қайратта» ойнағанда, бұл балалар академияда жүгіріп жүретін. Клубтан кеткеніме 5-6 жыл болды. Олар да өсіп, өнді. Дастанға тек қана сәттілік тілеймін», – деп қорытындылады футболшы.

Еске сала кетейік, өткен маусым 17 жастағы Дастан Сәтпаев үшін нағыз серпіліс болды. Ересектер деңгейіндегі дебюттік жылында шабуылшы «Қайрат» сапында барлық жарыста 41 матч өткізіп, 19 гол соқты және сегіз нәтижелі пас берді.

18 жасқа толған соң футболшы англиялық «Челсиге» ауысады деп күтілуде.

Бұған дейін Исламхан алматылық клубтың қазіргі құрамындағы жас ойыншылардың әлеуетіне тоқталды.