Исламхан «Қайраттың» жас ойыншыларына кеңес берді: бастары айналып қалмау керек

«Қайраттың» бұрынғы капитаны Бауыржан Исламхан ASnews.kz сайтына берген сұхбатында алматылық клубтың қазіргі құрамындағы жас ойыншылардың әлеуетіне тоқталды.

32 застағвэы футболшы Дастан Сатпаев, Темірлан Анарбеков және Шерхан Қалмұрзаның болашағына оң баға беріп, оларды өз буынымен салыстырудың қажеті жоқ екенін айтты.

«Бізбен салыстырудың мәні жоқ. Жастардың дамып келе жатқанына қуанамын. Әр дәуірдің өз жұлдыздары бар. Алла қаласа, олардың үлкен жетістіктерге жетіп, Қазақстанның атын шығарып жүргенін көреміз», – деді ол.

Бауыржан жас футболшыларға түсетін қысым мәселесіне де ерекше тоқталып, алматылық клубтың шабуылшысы Дастан Сатпаевқа жеке кеңес берді:

«Танымалдылық – қысым ба? Бұл пікірмен келіспеймін, себебі мұның бәрінен өтуге болады. Сені мақтаса – бұл жақсы, бірақ бұдан бас айналып қалмау керек. Ал Саәпаевқа келсек, оның көздеген мақсаты бар. Оған жету үшін не істеу керек? Күн сайын алға бір қадам жасауы тиіс. Егер жан-жаққа алаңдап, бәріне еліктей берсең, мақсатыңа жете алмайсың», – деп түйіндеді футболшы.

Биыл 17 жастағы Дастан Сатпаев дебюттік маусымында 41 матч өткізіп, 19 гол соқты, 8 нәтижелі пас берді.

Темірлан Анарбеков Александр Заруцкий жарақат алғаннан кейін команданың негізгі қақпашысына айналды. Ол 19 матчта 14 гол өткізіп, 11 ойында қақпасын голдан аман сақтады. Анарбеков «Селтикке» қарсы Чемпиондар лигасының плей-офф раундында қақпаны қорғап, сол ойынның нәтижесінде алматылықтар өз тарихында алғаш рет Чемпиондар лигасының жалпы кезеңіне жолдама алды.

Шерхан Қалмұрза «Қайрат» сапындағы дебютін «Ақтөбеге» қарсы ойында (1:0) өткізіп, жақ сүйегі сынған Анарбековтің орнына алаңға шықты. Кейіннен қақпашы лиссабондық «Спортинг» (1:4) және мадридтік «Реалға» (0:5) қарсы матчтарда ойнады.

Бұған дейін Бауыржан Исламхан еурокубоктардағы ең ауыр жеңілісін есіне алған болатын.