«Леванте» футболшысы өзін қай клубтың түлегі санайтынын айтты

«Леванте» клубының 17 жастағы қазақстандық футболшысы Алдияр Нұрғали ASnews.kz сайтына берген сұхбатында өзін қай клубтың түлегі санайтынын айтты.

«Шынымды айтсам, нақты жауап беру қиын – екі клубтың да маған берері көп болды. Қай командада қанша уақыт болғаным маңызды емес, ең бастысы – сол жерде не үйренгенім. «Астанаға» да, «Қайратқа» да өте ризамын, әлі күнге дейін олардың бапкерлері және ойыншыларымен байланысымды үзген жоқпын. Дұрысы – мен өзімді қазақстандық футболдың түлегі деп санаймын», – деп түсіндірді Алдияр.

Астана қаласының тумасы жеті жасында елордадағы футбол орталығына қабылданған. 2021 жылы «Қайраттан» шақырту алып, алматылық клубтың құрылымында екі жыл өнер көрсетті. «Қайрат» академиясында ойнаған кезінде вингер Қазақстан чемпионатының үздік ойыншысы әрі үздік сұрмергені атанды.

Осы айда Қазақстан жасөспірімдер құрамасының ойыншысы «Левантенің» қосалқы командасымен ұзақ мерзімді келісімшартқа қол қойды. Сондай-ақ футболшыға «Валенсия» мен «Вильярреал» клубтары да қызығушылық танытқан.