«Ахмат» Кенжебектің трансфері жайлы келісімге келген жоқ

«Ахматтың» құрылымында жұмыс істейтін мамандар Ғалымжан Кенжебектің Грозный клубына ауысуына қатысты тараған ақпаратқа түсініктеме берді, деп хабарлайды ASnews.kz.

Клубтағылар асығыс қорытынды жасамауға шақырды:

«Кенжебектің трансфері туралы жазып жүргендер – кезінде Қузяевты да біздің командаға «жөнелткен» адамдар. Жарияланып жатқан ақпаратқа бірден сенбес едім», – деді клубқа жақын дереккөз.

Бұған дейін бұқаралық ақпарат құралдарында 22 жастағы вингердің Станислав Черчесов баптайтын командаға ауысуы мүмкін екені жөнінде ақпараттар шыққан болатын. Қазіргі таңда «Ахмат» Ресей Премьер-лигасының турнирлік кестесінде сегізінші орында тұр.

«Ахмат» сапында қазірдің өзінде алты бірдей вингер бар: Брайан Мансилья, Лечи Садулаев, Абакар Гаджиев, Рифат Жемалетдинов, Эгаш Касинтура және қазақстандық Максим Самородов.

Сонымен қатар, резервте ойнайтын 21 жастағы Магомед Якуев та негізгі командаға ауыстырылды.

Өткен маусымда Ғалымжан Кенжебек 11 матчқа қатысып, алты гол соғып, төрт нәтижелі пас берген.