«Левантедегі» қазақстандық шабуылшы: «Валенсия» мен «Вильярреал» тарапынан да ұсыныстар болды

17 жастағы қазақстандық шабуылшы Алдияр Нұрғали ASnews.kz сайтына берген сұхбатында испаниялық «Леванте» клубымен жасалған келісімшартқа егжей-тегжейлі тоқталды.

«Қыркүйек айында басталатын жаңа маусымнан бастап резервтік командаға қосыламын. Сол жерден негізгі құрамда дебют жасауға мүмкіндік болады. Келісімшарт «3+2» жүйесі бойынша жасалды, алғашқы жыл – бейімделу кезеңі», – деді Астананың тумасы.

Сонымен қатар, вингерге Испанияның өзге де танымал клубтары қызығушылық танытқан екен:

«Валенсия» мен «Вильярреал» тарапынан да ұсыныстар болды, алайда ол клубтарда тек U19 құрамында, яғни өз жас санатымда ғана ойнайтын едім. Демек, «Леванте» шынымен де менің әлеуетімді байқаған», – деп қосты ол.

Алдияр Нұрғали Испанияға 2023 жылдың жазында қоныс аударды. Бұған дейін «Хисторикстің» жасөспірімдер командасында, сондай-ақ «Астана» мен «Қайраттың» футбол орталықтарында өнер көрсеткен.

2026 жылғы Еуропа чемпионатының іріктеу кезеңінде Нұрғали Нидерландтың U19 құрамасына гол соғып (1:2), көзге түсті. Үш матчтың қорытындысы бойынша Қазақстан жастар құрамасы элиталық раундқа жолдама алды.