Ресейлік эксперт – Зайнутдинов туралы: Карпин оны дұрыс пайдаланбады

Матч ТВ комментаторы Артем Шмельков ASnews.kz сайтына берген сұхбатында Бақтиер Зайнутдиновтың «Динамодағы» болашағы туралы пікір білдірді.

«Зайнутдинов үшін басты мәселе бапкердің ауысуы немесе командадағы мәртебесі емес, денсаулығы. Оның жасына қарасақ, нағыз мансабының қызған шағында тұр, бірақ жиі жарақат алуда. Бақтиер соңғы үш маусымды есептеп қарасақ, өте аз ойнады, әсіресе, «Бешикташта» жүргенде. Бұл алаңдатарлық жағдай», – деді ресейлік маман.

Шмельковтың пікірінше, қазақстандық футболшы басқа позицияда жақсырақ өнер көрсете алар еді:

«Маған ол ойыншы ретінде ұнайды: өте ақылды, жан-жақты, бірақ орталық қорғаушы ретінде емес. Карпиннің неге Бақтиерды қорғанысқа қойғанын білмеймін. Осы тұрғыдан алғанда, «Динамо» шатасып қалды: кімді қарасаңыз да, бұл рөлде ешкім сенімді көрінбеді. Сондықтан Зайнутдиновты қойып көрді.

Менің ойымша, ол шығармашылыққа жауап беретін жартылай қорғаушы немесе қаптал ойыншысы. Сол қаптал қорғаушысы ретінде де ойнай алады. Онда Бахамен бәсекелесетін супержұлдыздар жоқ. Рубенс пен Скопинцев оған бәсекелес бола алады, бірақ мен оларды Лаксальт сияқты қапталды нығайтар еді деп айтпас едім», – деп қосты ол.

27 жастағы Зайнутдинов осы жазда Валерий Карпиннің шақыртуымен Мәскеудің «Динамосына» қосылды. Бірақ клубты қазір Ролан Гусев жаттықтыруда.

Осы маусымда Бақтиер 10 матчқа қатысып, бірде-бір гол соға алмады, керісінше, екі рет қателесіп, «Динамо» қақпасына гол өткізіп алды. Сондай-ақ, ол жарақаттарына байланысты екі ай ойнамады.

Бұған дейін Бахтиёр Зайнутдиновтың алғашқы бапкері Рахмон Устабаев ойыншының Еуропаға кету мүмкіндігі туралы айтқан болатын.