Бельгия бапкері – Қазақстанмен болған ойыннан кейін: матч бұлай басталады деп ойламадық

Бельгия құрамасы бас бапкерінің көмекшісі Клод Фишо Қазақстанмен болған ойын (1:1) туралы пікір білдірді, деп хабарлайды ASnews.kz.

«Біз ойынға кірісе алмадық. Алаңға үйренуге көп уақытымыз кетіп қалды. Бірінші таймда қиналып қалдық. Ал екінші таймда жиналып, тең нәтиже тіркедік. Өздеріңіз көргендей, біздің команда тарапынан өте көп соққы жасалды.

Ойын бұлай басталады деп ойламадық. Ойыншыларға бұл туралы ескерткен едік, бірақ Қазақстан өз стилінде соққы жасап, ойын басында-ақ есеп ашып кетті.

Әлем чемпионатының жолдамасын бүгін алғанда, тойлайтын едік. Бірақ мұны сейсенбі күнге қалдырдық.

Бізде жаңадан ойнап жатқан ойыншылар бар. Бұл Бельгияның қиналып бастаған бірінші ойыны емес. Сараптама жасап, мұндайды болдырмас үшін қатемен жұмыс жасаймыз.

Бүгінгі ойынға арналған жоспарымыз болды. Оны екінші таймда көрдіңіздер. Докуды ерекшелеп айтсам болады. Қақпашыларыңыз бүгін жақсы ойын көрсетті», – деді Бельгия бапкері.

Бельгия 15 қараша күні ӘЧ-2026 іріктеу кезеңі аясында Қазақстанмен ұпай бөлісті. Алты матчта 15 ұпай жинаған «қызыл сойқандар» бүгін тікелей жолдамаға иелік ете алмай қалды.

Бельгия іріктеу кезеңіндегі соңғы ойынын 18 қарашада Лихтенштейнге қарсы өткізеді.