Бельгияның бас бапкері – Қазақстанмен болатын ойын алдында: бізге ерте қуануға болмайды

Бельгия құрамасының бас бапкері Руди Гарсия Қазақстанға қарсы матч алдындағы баспасөз мәслихатында ертеңгі ойын жайлы пікірімен бөлісті, деп хабарлайды ASnews.kz.

«Қақпашы таңдау қиын болған жоқ. Бірақ кім тұратынын айта алмаймын. Тилеманс ертең капитан ретінде алаңға шығады. Негізгі құрамды енді таңдаймыз. Жанкүйерлер мен сарапшылар айтып жатқандай, ерте қуануға болмайды. Біз жасанды алаңда ойнайтынымызды ұмытпауымыз керек. Іріктеу кезеңін ертең, сенбі күні аяқтап, әлем чемпионатының жолдамасын сейсенбіге қалдырғымыз келмейді. Бұл үшін мықты ойыншыларымыздың барлығы алаңға шығып, барын салады деп үміттенемін.

Жасанды алаң біз үшін қатты қауіпті емес. Ертеңгі ойын алдында жасанды алаң, алыс сапар, уақыт айырмашылығы секілді сылтау айтпауымыз керек. Ертең тек жеңіс үшін ойнаймыз.

Қазақстан құрамасында бапкер өзгергенімен, бұрынғы футболшылары ойнап жүр. Олар тек ойын жүйесін өзгертті. Қазақстан құрамасындағы басты қауіп шабуылшысынан төнеді. Бұған дейін үш қорғаушымен ойнап жүр еді, соңғы кездері 4-3-3 схемасына ауысты», – деді Гарсия.

Бельгия 15 қараша күні ӘЧ-2026 іріктеу кезеңі аясында Қазақстанмен ойнайды. Алты матчта 14 ұпай жинаған «қызыл сойқандар» J тобында көш бастап келеді.