Қашкенннің әкесі – ұлының Қазақстан құрамасына шақыртылғаны жайлы: масқара болудың қажеті қанша?

Дінмұхаммед Қашкеннің әкесі әрі каратэ шинкиокушинкайдан Қазақстан федерациясының президенті Болат Бақтаев ASnews.kz сайтына берген сұхбатында ұлының ұлттық құрамаға шақыртылуына қатысты пікірімен бөлісті.

– Сіздің ұлыңызды ұлттық құрамаға шақырған кезде бұл үшін қанша ақша төледі деген пікірлер жазылды. Бұл сізге қалай әсер етті әлде назар аудармадыңыз ба? Мүмкін көңіл бөліп, ұлыңызбен сөйлескен шығарсыз...

– Бұл әңгімелер менің көңіліме тиді. Маған ұлттық құрамадағы орынды сатып алудың қажеті қанша? Бұл біреуді жасырын ұстайтын спорт түрі емес қой. Бәрі көрініп тұр. Мұндай болмашы идеяға ақша құртып, масқара болудың қандай пайдасы бар? Бұған дейін де ұлттық құрамаға шақырып еді, сол кезде де хейт көбейді. Бапкерлер шошып, оны ұлттық құрамадан алып тастады. Одан да командаға шақырмай-ақ қоймай ма?

– Сіз үшін Димаштың біреудің ала жібін аттамай, отбасының, әкесінің атына кір келтірмегені маңызды ма?

– Иә, өте маңызды. Ол үлкендермен де, өзінен кішілермен де жақсы араласады. «Астанада»» жүрген кезде де, қазір «Жетісуда» да жанкүйерлерін қуантқысы келіп тұрады. Жейдесін сыйлайды, барын салып ойнайды дегендей. Оны қызғаншақ болмасын деп тәрбиеледім. Әлібеков әлгі шығарылымды түсірген соң хейт көбейе бастады. 

– Бұл түсірілім жайлы білгенде, қарсы болар ма едіңіз? 

– Әрине, түбегейлі қарсы болар едім. Мені байқасаңыз, әлеуметтік желіге мүлдем кірмеймін. Федерация, жұмыс, үй ғана. Басқа ештеңемен айналыспаймын.

– Сұхбатты да сирек бересіз

– Тек турнир кезінде ғана сұхбат беремін. Күн сайын халықтың алдына шығып, хайп жасайтын адам емеспін. Адамдар мұны әртүрлі қабылдайды.

– Ал Димашқа бұл туралы айтасыз ба?

–Әрдайым айтып отырамын. Халықтың көзіне түсе берме деп. Футболды салып жатырмын ғой дейді. Бірақ адамдар оны емес, қызығырақ нәрсені көреді.

Қашкен Қазақстан құрамасына шақырылардан алдын Бейбіт Әлібековтің «По домам» деген бағдарламасына түскен еді. Ол жерде Димаштың үйіне, өміріне шолу жасалды.