Дінмұхаммед Қашкен: ұлттық құрамаға бас бапкер шақырып тұрса, лайықпын деп ойлаймын

25 жастағы қазақстандық қорғаушы Дінмұхаммед Қашкен ASnews.kz сайтына берген сұхбатында ұлттық құрамаға шақыртылған кездегі реакциясымен бөлісті.

– Ұлттық құрамаға шақырған кездегі алғашқы реакция қандай болды?

– Шынымды айтсам, сенбедім. Маған клуб менеджері хабарласып, «паспортыңды жібер, сені ұлттық құрамаға шақырып жатыр» деді. Сәл қобалжып қалдым. Түсініксіз жағдай болды. Қобалжығаныммен, бұл жаңалыққа қатты қуандым. 

– Ұлттық құрамаға баруға лайықпын деп ойлайсың ба?

– Бас бапкер шақырып тұрса, лайықпын деп ойлаймын. Көп еңбектендім. Ал бұған қатысты кері пікір жазғандарды жай ғана хейтерлер деп қабылдаймын.

– Ұлттық құрамаға шақыртылған кезде әлеуметтік желіні оқи бастадың ба әлде оған құлшынысың болмады ма?

– Жоқ, ақтарған жоқпын. Бұл туралы әртүрлі пабликтер жаза бастады. Бір көз жүгіртіп өттім. Қатты әсер еткен жоқ.

– Жекеңе де жазған шығар

– Иә, көбісі дайректке жаза бастады. Бір-екеуін ғана оқыдым. Жетпіс пайызға жуығы жақсы пікір жазса, қалған отыз пайызы хейтерлер болды. Олар басқа аккаунтармен жазады.

– Сені өте қатты сынап, «ұлттық құрамаға таныс арқылы келген» деп айтатын адамдарға ренішің бар ма?

– Жоқ, жақын адамым ғана болмаса, хейтерлер айта береді. Бірақ олар тек сыртымнан жазады, ал бетіме келіп ешқайсысы айта алмайды. Ондайды кез-келген адам жасай алады. Мен де екінші аккаунт ашып, солай жазсам болады. Ренішім жоқ.

«Жетісу» қорғаушысы қазан айындағы халықаралық үзіліс кезінде Қазақстан құрамасына шақырту алғанымен, Лихтенштейн және Солтүстік Македониямен болған матчтарға қатыспады.