Қашкен – ұлттық құрамаға шақыртылғаны жайлы: 200 миллион төлеп, негізгі құрамда ойнар едім

Қазан айындағы халықаралық үзіліс кезінде Қазақстан құрамасына шақыртылған Дінмұхаммед Қашкен ASnews.kz сайтына берген сұхбатында «ұлттық құрамаға таныс, ақша арқылы келді» деген пікірлерге қатысты өз ойын айтты.

– Қашкеннің өзі немесе туыстары ұлттық құрамаға бару үшін ақша төледі деген сөз намысыңа тимей ме?

– Жасырмаймын, біздің жанұямыз кедей емес. Ұлттық құрамадағы орынды сатып алып, масқара болғанша, мансабымды аяқтай салғаным дұрыс болар еді. Менің мансабымды аяқтап, айналысатын тірлігім көп. Бірақ ұлттық құрамада, Еуропада ойнаймын деген арманым бар. Сондықтан жазып жатқан пікірлердің барлығы бос сөз. 

– Ұлттық құрамадағы орнын сатып алды деп айтатындарға жауап бергің келеді ме. Тіпті сенің қанша төлегеніңе де айтып жатыр. Кейбірі он миллион, кейбірі он бес миллион теңге дейді...

– Менің ойымша, ұлттық құрамада ойнау үшін 10-15 миллионның өзі аз болар еді. Ештеңе демеймін, солай ойлай берсін, өздері біледі. Өз ойым, бұл ақшаны бизнеске құяр едім. 

– Тіпті негізгі құрамдағы орнын да сатып алды дейді...

– Ұлттық құрамаға барып, қосалқы құрамда отырғанша, 200 миллион төлеп негізгі құрамда ойнағаным дұрыс емес пе? Ақыры сатып алып жатыр екенмін, бірден негізгі құрамды алу керек. Әзіл, әрине.

25 жастағы қорғаушы өткен маусымды «Ұлытау» сапында бастап, жазда «Жетісуға» ауысты.

Қазан айында Талғат Байсуфинов Қашкенді ұлттық құрамаға шақырып, оның көрсеткіштері басқа кандидаттарға қарағанда жақсы екенін айтқан еді.