Ақпаев: тоқырау ойыншылардың жаңа нәрсені үйренгісі келмегенінен болып жатыр

Қазақстан футбол федерациясының бұрынғы вице-президенті Тілекбек Ақпаев ASnews.kz тілшісіне берген сұхбатында отандық футболдың бүгінгі ахуалы мен прогресс болмауының себептері туралы айтты.

«Футболда тоқырауға ұшырап жатқанымызды көптен бері айтып келемін. Жеңіп жүргеніміз жүйелі жұмыстың емес, жеке шеберліктің арқасы. Жүйелі жұмыстың арқасында жеңіске жетсек, әңгіме басқаша болар еді. Қазір ұлттық құраманың жеңістері тек саусақпен санарлық қана. Соңғы 30 жылда қанша рет Еуропа мен әлем чемпионатының іріктеу кезеңінде бақ сынадық… Нешеуінде жеңіске жеттік? Статистика қанша рет жеңіске жеттік, қанша рет ұтылдық, бәрін көрсетіп тұр.

Менің ойымша, тоқырау біздің ойыншылар футболдың жаңа стилін, жаңа әдістемені үйренгісі келмейтіндіктен орын алып отыр. Тіпті өз елімізде ешкімге керек болмаған мамандарды шақырамыз. Нәтиже осыдан шығып жатыр», – деді Ақпаев.

Қазақстан құрамасын Әли Әлиев кеткелі бері уақытша Талғат Байсуфинов жаттықтыруда. Оның жетекшілігімен команда 2026 жылғы әлем чемпионатының іріктеу кезеңінде екі матч өткізіп, Лихтенштейнді 4:0 есебімен жеңді, Солтүстік Македониямен тең ойнады (1:1).

Бұған дейін Тілекбек Ақпаев еліміздегі жаттықтырушылар корпусының дамуы туралы айтып, ұлттық құраманы кім баптауы керектігі туралы пікірімен бөліскен болатын.