Қазақстандық эксперт – Скопьедегі нәтиже туралы: жігіттер сенімділік танытты, командада прогресс бар

Футбол блогері Әлімжан Тасболатұлы ASnews.kz тілшісіне берген сұхбатында 1:1 есебімен аяқталған Солтүстік Македония – Қазақстан матчы жайлы пікірімен бөлісті.

«Ойын өте жақсы өтті. Біз төрт қорғаушы жүйесіне ауысып, шабуыл шебінде сенімді ойынды көрдік – команда әдемі ойнады. Әрине, алдымен гол соғып, кейін гол жіберіп алғанымыз өкінішті. Бірақ бізге матч алдында 1:1 есебімен тең ойнайсыңдар деп айтса, біз мұны жақсы қабылдайтын едік. Бұл жаман емес, жақсы нәтиже. Жаттықтырушыларға алғыс айтқым келеді – жігіттер сенімділік танытып, әлем чемпионатына жақын тұрған командадан ұпай алды. Біздің команданың деңгейі көтеріліп келеді деп айтуға болады», – деді Тасболатұлы.

Қазақстан 2026 жылғы әлем чемпионатының іріктеу кезеңі аясында сырт алаңда Солтүстік Македониямен тең ойнады. Қазақстан сапында Дінмұхамед Қараман гол соқты.

Бұған дейін журналист әрі комментатор Ербол Қайыров матчтан алған әсерімен бөлісіп, «ұлттық құрамаға шетелдік жаттықтырушы қажет пе?» деген сауал қойған еді.