Македония құрамасының аңызы – Қазақстанға қарсы матч алдында: Бельгиямен тең ойнағанымызға ризамыз

Мәскеулік «Спартактың» бұрынғы қорғаушысы мен Солтүстік Македония жастар құрамасының директоры Игор Митрески ASnews.kz тілшісіне берген сұхбатында Бельгиямен болған матч (0:0) жайлы пікір білдірді.

«Біз топта көш бастап келеміз, бірақ Бельгиямен өткен соңғы ойын өте қиын болды. Шындығында, мұндай нәтижені бізден ешкім күтпеген еді. Жігіттер тамаша өнер көрсетті: қорғаушылар қателік жібермеді, ал қақпашымыз қажет кезде құтқарып қалды. Әрине, біз гол соғатын мүмкіндіктер жасай қойған жоқпыз, бірақ мұндай қарсыласпен тең ойнағанымызға қуануымыз керек», – деді сарапшы.

Митрески ұлттық құраманың күшті жақтарын да атап өтті:

«Менің кезімде де, қазір де ұлттық құрама ойыншылары барын салуда. Сондықтан олардың командаға деген адалдығы біздің команданың қозғаушы күші деп айтар едім. Команда құрамында көшбасшы футболшылар да бар: Элмас, Барди, Димитриевски. Ал бапкер Милевски ұзақ уақыттан бері осында жұмыс істеп келеді. Ол футболшылардың әлеуетін жақсы ашады».

Солтүстік Македония ӘЧ-2026 іріктеу кезеңінің жетінші турында Бельгиямен тең ойнаған болатын.

Қазақстан құрамасы 13 қазан күні Тоше Проески стадионында Солтүстік Македониямен кездеседі.