Ербол Қайыров: ҚФФ-ның берген жауабы Омаровтың «ашық жұмыс істеу» туралы уәдесіне қайшы келеді

ASnews.kz сайтының бас редакторы әрі спорт журналисті Ербол Қайыров Қазақстан футбол федерациясына (ҚФФ) жолданған ресми сауал туралы пікір білдірді.

«16 қыркүйекте ASnews.kz редакциясы «БАҚ туралы» ҚР Заңына сәйкес федерацияға ресми сауал жолдады. Біз мүмкін болатын кадрлық өзгерістер туралы, сондай-ақ Бельгияға ұшқан чартерлік рейстегі делегацияның құрамына ҚФФ-да жұмыс істемейтін қызметкерлердің неліктен енгізілгені туралы объективті ақпарат алғымыз келді. Бұған жауап ретінде «Жеке деректер және оны қорғау туралы» заңның ережесі келді. Бірақ бұл ҚФФ президенті Марат Омаровтың сөзіне қайшы келеді, ол өз жұмысын ашық әрі адал жүргізуге уәде берген», – деді Қайыров.

Журналистің айтуынша, хатқа мұндай өтініштерге жауап беруге уәкілетті тұлға саналатын Бас хатшы Давид Лория емес, сенімді өкіл Б.Тұрсынов қол қойған.

Сонымен қатар, Қайыров жаңағы айтқан жеке деректер туралы заңға сәйкес, ҚФФ-ға жаңа қызметкерлер келгенін атап өтті. Бейресми мәліметтер бойынша, Лория қазір «Елімай» клубында жұмыс істейтін адамды кеңесші ретінде қызметке алған.

Сондай-ақ редакция Давид Лорияны бейнесұхбатқа шақырды.

«Әрине, сұхбат федерация тарапынан ешқандай түзетусіз, тікелей сұрақтармен жүргізілуі тиіс. Бірақ Лория бәрібір келмейді. Өйткені мұндай сұхбат тым көп қызықты жайттарды ашып, оның отставкаға кетуіне әкелуі мүмкін», – деп қосты Қайыров.