Максим Самородов: Ресейге кетіп, дұрыс таңдау жасадым

Қазақстан құрамасының шабуылшысы Максим Самородов «Футбол Жолы» ютуб-арнасының жүргізушісі Ербол Қайыровқа берген сұхбатында Ресейге ауысу нұсқасы туралы және басқа командалардан түскен ұсыныс жайлы айтты, деп хабарлайды BorodAbata.kz.

– «Ахматтан» Ресейдің басқа топ-командасына ауысу туралы ақпараттар саған қалай әсер етті?

«Менен бұл туралы сұрайтындар көп. Сол адамдар бұған қатысты маған карағанда көп білетін сияқты. Қатты үңіліп, бұл туралы жаңалықтар оқыған жоқпын. Көңілімді басқа жаққа бұрмауға тырыстым».

– Сен «Ақтөбеде» жүрген кезде «Спартактың» қызығушылық танытқаны туралы ақпарат болды. Осы немесе басқа да клубтардан нақты ұсыныстар түсті ме?

«Тек әңгімемен шектелді. Менімен ешқандай клуб байланысқа шықпады және ешқандай да әңгіме болған жоқ».

– Ресейге кетіп дұрыс таңдау жасадым деп ойлайсың ба? Себебі сол кезде саған Швейцария мен Австрияның клубтары көз тіккен еді.

«Иә, дұрыс таңдау жасадым деп есептеймін. Өз арманыма асықпай, әртүрлі кезеңнен өтіп жеткім келеді. Бірден Еуропаға кету қиынырақ болар еді. Тіл жағынан да, ойын стилі жағынан да Қазақстаннан қатты ерекшеленеді. Сондықтан да дұрыс таңдау жасағаныма сенімдімін.

Қазір ағылшын тілін үйреніп жүрмін. Легионерлермен сөйлесіп, практика жүзінде дайындаламын. Ұлттық құрамада Рамазан Оразов ағылшынша жақсы сөйлейді. Маған да осы тілді үйренуге кеңес берді. Үйренуге тырысып жатырмын.

ТОП-5 чемпионатта ойнау менің ғана емес, кез-келген футболшының арманы. Бәрі тек өзіме байланысты».