Дәурен Турсағұлов: басты мақсатымыз – Еуропа чемпионатына шығу еді, орындай алмадық

Футзалдан Қазақстан құрамасының ойыншысы Дәурен Турсағұлов Италиямен өткен плей-офф ойыны туралы ASnews.kz тілшісіне пікір білдірді.

«Екі ойын да жақсы өтті. Бапкер айтқан тапсырмаларды орындадық. Басты мақсатымыз Еуропа чемпионатына шығу еді, өкінішке орай, орындай алмадық. Негізі ойын жақсы болды. Пенальти сериясына дайындалмадық, оған үлгермедік. Менің кезегім бесінші еді, бірақ маған жеткен жоқ. Иә, мүмкіндік көп болды, бірақ бұйырмады.

Қатты бас түсірмейміз, қателіктерімізді талдаймыз, алға ұмтыламыз. Гол жіберген сәтте артқа түсіп қалдық, бапкердің айтқаны – алдыға қарай ойнауымыз керек еді. Тактиканы толық орындамадық, бір гол рикошетпен кірді. Фолды да көп жасауға тура келді. Бұл жеңіліс бізге ауыр тиді.

Мен өзім Еуропа чемпионатында екі рет болдым. Әрине, неден айырылғанымыз қатты сезіледі», – деді Турсағұлов.