Стоиловтың агенті – Қазақстан құрамасына оралуы туралы: қызығушылық танытқандарына рахмет

58 жастағы болгариялық маман Станимир Стоилов Қазақстан құрамасына қайта оралу мүмкіндігін қарастырып отырған жоқ, деп хабарлайды ASnews.kz.

Бұқаралық ақпарат құралдарының хабарлауынша, ұлттық құраманың бұрынғы бапкеріне Қазақстан футбол федерациясы қызығушылық танытқан. Дегенмен, Стоилов түркиялық «Гезтепе» клубындағы жұмысын жалғастырмақ ниетте. Олар осы маусымда Суперлигада жақсы өнер көрсетуде, бастапқы алты матчта жеңілмеді, ал соңғы ойында «Бешикташты» 3:0 есебімен жеңді.

«Қызығушылық танытқандарыңызға рахмет, бірақ Стоилов мырзаның клубпен жарамды келісімшарты бар», – деді ASnews.kz тілшісіне Стоиловтың агенті Элиас Элиа.

Стоилов Қазақстан құрамасын 2018 жылдың наурызынан 2019 жылдың қаңтарына дейін жаттықтырды. Ұлттық құрама оның жетекшілігімен өткізген тоғыз матчтың үшеуінде жеңіске жетіп, үшеуінде жеңіліп, үшеуінде тең түскен. Болгариялық маман «Астанамен» бес трофейге қол жеткізіп, клубты Чемпиондар лигасының топтық кезеңіне шығарды.