Адырбеков «Тренчинге» ауысқаны туралы: мен әрқашан Еуропада ойнауды армандадым

Словакиялық «Тренчиннің» жаңа жартылай қорғаушысы Шахмұрза Адырбеков ASnews.kz тілшісіне берген сұхбатында трансфердің қалай жүзеге асқанын айтып берді. 19 жастағы футболшы бұған дейін «Тобыл» сапында өнер көрсеткен.

«Барлығы қарапайым: Әлімжан Қалдияров пен агентімнің арқасында «Тренчинмен» хабарласып, қаралымнан өту туралы келісімге келдік. 3 тамызда Словакияға келіп, бір апта қосалқы командамен жаттықтым. Кәсіби шеберлігімді дәлелдеп, негізгі командаға дейін жеттім, ал бір айдан кейін олар менімен келісімшарт жасасты», – деді Шахмұрза.

Сондай-ақ ойыншы трансферден кейінгі алғашқы реакциясымен бөлісті:

«Әрине, мен керемет эмоцияларды бастан өткердім. Өйткені, әрқашан Еуропада ойнауды армандадым, бірақ бұл тек бастамасы деп ойлаймын – мұнда көп бөгелмей, бұдан да күшті лигаға ауысамын деген үмітім бар. Жергілікті тұрғындардың футболмен өмір сүретіні, ойыншылардың жаттығу кезінде де барын салатыны мені таң қалдырды.

Барлығы өздерінің негізгі құрамдағы орынға лайық екенін дәлелдегісі келеді және мұның бәрі бапкеріміздің арқасында. Ол киім ауыстыратын бөлмеде керемет атмосфера орнатты. «Тренчин» – ауызбіршілігі мықты команда».

Адырбеков QJ лигада 18 матч өткізіп, алты гол соқты. Ол жартылай қорғаушы және вингер ретінде ойнай алады.

Сегіз турдан кейін «Тренчин» Словакия чемпионатының турнирлік кестесінде төртінші орында тұр.