Кенжебек – «Хартстың» ұсынысы жайлы: Солтүстік Македонияға қарсы матчта ойынымды тамашалапты

Қазақстан құрамасының жартылай қорғаушысы Ғалымжан Кенжебек «Елімайға» ауысу себебін түсіндіріп берді, деп хабарлайды ASnews.kz.

«Кошицемен» үш жылдық келісімшартым болды. Словакиялық клубқа ауысқан кезімде бапкер үш шабуылшымен ойнайтын еді. Мен келгеннен кейін ойын схемасы екі шабуылшыға ауысып кетті. Вингер позициясында ойнағандықтан, бірден ойын уақытым азайды. Сосын Еуропадағы футбол маусымы аяқталды. Бас бапкер келіп: «Сенің ойының маған ұнайды, бірақ өзің қалағандай ойын уақытын бере алмаймын. Кеткің келсе кет, қалғың келсе қал» деп ашық айтты. Агентім екеуміз сөйлесіп, «Елімайды» таңдадық. Бұл үшін еш өкінбеймін», – деді Ғалымжан Sport Pulse ютуб-арнасына берген сұхбатында.

22 жастағы футболшы «Елімайға» ауыспас бұрын шотландиялық клубтың қызығушылық танытқанын растады:

«Агентімнің айтуынша, «Хартс» клубының өкілдері Солтүстік Македониямен болған матчты тамашалаған екен. Бірақ қағаз жүзінде ұсыныс түскен жоқ».

Кенжебек «Елімайға» ауысқалы бері ҚПЛ-да 8 матч өткізіп, 5 гол мен 3 нәтижелі пасты өз атына жазды.