«Астана» қорғаушысы Кажуколовас маусымды ерте аяқтайды – тізе жарақаты қайталанды

24 жастағы «Астана» қорғаушысы Кипрас Кажуколовас маусым соңына дейін алаңға шықпайды. Литвалық ойыншы крест байламын үзіп алды, деп хабарлайды AS News (BorodAbata.kz).

Бұл елордалықтар үшін алаңдатарлық жағдай, өйткені футболшы бұған дейін бірнеше рет тізесіне ота жасатқан: тек «крест» емес, жанама байламдары да жыртылған болатын.

«Брайтондағы» төрт жылдың ішінде 3,5 жыл жарақатпен жүрдім. Мұндай кезеңде алты айдай ғана жаттығуға мүмкіндік болды», – деген еді Кипрас қаңтар айындағы сұхбатында. Енді оны тағы да ұзақ оңалту кезеңі күтіп тұр.

Григорий Бабаян шәкірттері маусымды 26 қазанда «Қайратқа» қарсы сырт алаңдағы ойынмен аяқтайды. Қазіргі сәтте «Астана» КПЛ турнир кестесінде көш бастап тұр.

Биыл Кажуколовас барлық турнирлерді қоса есептегенде 22 матч өткізді.