Өзбекстандық скаут – Умаровтың «Тобылға» ауысуы жайлы: құрамаға қайта оралуын күтпеймін

Өзбекстандық Championat.Asia сайтының журналисі әрі «Пахтакордың» бұрынғы скауты Николай Егорычев BorodAbata.kz (AS News) порталына берген сұхбатында Өзбекстан құрамасының жартылай қорғаушысы Шохбоз Умаровтың қостанайлық «Тобылға» ауысуын бағалады.

«Шохбоз Умаровтың да, Жасур Яхшибоевтың да басты мәселесі – тұрақтылықтың жоқтығы. Мұндай футболшыларды «көңіл-күй ойыншысы» дейді. Егер бәрі жақсы болса, ойын жүріп тұрса, онда Умаров өте жақсы футбол көрсете алады.

Шымкентке екі рет барғанмын: «Ордабасының» чемпиондық ойынында («Шахтерге» қарсы) және Чемпиондар лигасының іріктеуінде «Петрокубқа» қарсы матчында болдым. Жергілікті жанкүйерлердің Умаровты қатты жақсы көргенін білемін. Ойыннан бұрын да, кейін де адамдармен сөйлестім, олар: «Бұл біздің жергілікті Неймарымыз» дейтін. Яхшибоев та жақсы ойын көрсетті, «Ордабасыға» көп пайдасын тигізді».

Сондай-ақ сарапшы Умаровтың Өзбекстан құрамасына қайта оралуы екіталай екенін атап өтті:

«Умаровтың ұлттық құрамасына қайта шақырылуына келсек, менің ойымша, мүмкіндіктері аз. Қапталда Умаровтан анағұрлым мықты футболшылар бар – Файзуллаев, Урунов, Эркинов. Машарипов пен Тұрғынбоев та жоғары бағаланады. Сонымен қатар жас ойыншылар Жиянов, Одилов және жақында Бельгияның «Антверпен» клубына ауысқан Уринбоев бар (ол құрамаға әлі шақырылған жоқ, бірақ мүмкіндіктері Умаровтан көп).

Иә, Шохбоз өткен жылы Азия кубогына баратын ойыншылар қатарында болды, бірақ соңғы үш жылда оның құрама сапында бар болғаны екі-ақ матчы бар. Яхшибоев та сол. Менің ойымша, олардың жақын болашақта Өзбекстан құрамасына қайта оралуын күтпеу керек. Құраманың қапталдардағы қазіргі жағдайына қарап, дәл осындай қорытынды жасауға болады».

Еске салайық, Умаров бұған дейін АГМК, «Энергетик-БГУ», БАТЭ клубтарында, сондай-ақ Қазақстанда «Тұран» мен «Ордабасыда» ойнаған. Шымкенттік клубпен ол ел чемпионы әрі Кубок иегері атанған.