«Семейдің» бас бапкері Қазақстан Суперкубогында «Қайратпен» болатын матчқа дайындығы жайлы айтты

«Семей» клубының бас бапкері Аслан Смақов Қазақстан Суперкубогында «Қайратпен» болатын ойын жайлы пікірімен бөлісті, деп хабарлайды BorodAbata.kz (AS News).

«Оралға қонақжайлылығы үшін және осы ойынды ұйымдастырғаны үшін Футзал қауымдастығына алғысымды білдіремін. Федерациямен бірге біз футзалды дамытып жатырмыз, өйткені әлемдік футзал бір орында тұрмайды. Қазір ойыншылардың формасын бағалау қиын. Біз дайындықтың үшінші аптасындамыз. Алғашқы екі апта дене дайындығына арналды – ойыншылар күніне екі рет жаттығып, аэробты және анаэробты фазалардан өтті.

Күнтізбеге шағымдана алмаймыз, өйткені кәсіби мамандармыз. Футзалда барлығы ойын өтетін уақытта дайын болуы керек. Суперкубок – алғашқы ресми матч және ол кімнің қандай формада екенін көрсетеді. Біз жігіттерді бабына келтіру үшін бар күшімізді салдық. Тіпті демалыс кезінде де фитнес жаттықтырушы ойыншыларға жеке тапсырма берді», – деді Смақов.

«Семей» мен «Қайрат» арасындағы Суперкубок ойыны 23 тамызда Оралда өтеді.