Кенжебек – «Краснодарға» ауыспауы туралы: «Қайрат» ақша сұрапты

Қазақстан құрамасының шабуылшысы Ғалымжан Кенжебек YouTube-тағы BorodAbata арнасына берген сұхбатында «Краснодарға» ауысуына кедергі болған жағдайлар туралы айтып берді.

– Сенде Дастан Сәтпаев сияқты 16-17 жаста өзіңді көрсету мүмкіндігі болды ма?

– Ондай болған жоқ. Президент кубогы турнирінен кейін көп тани бастады. 2023 жылы Ресейдің «Краснодарына» қаралымға бардым. Бірақ ол жақта не болғанын өзім де түсінбедім. Кетіп бара жатқан кезде, бапкер маған: «ойының ұнады, сені командаға аламыз, қазір үйіңе барып, ондағылармен қоштасып, қайтадан «Краснодарға» келесің» деп айтты. Біз ол кезде Түркияда едік. Солай Алматыға қайттым. Трансфер кезеңі ашылуға жақындады. Ол кезде агентім ресейлік еді. Одан не болып жатқанын сұрадым. Жауап бермеді. Неге олай болғанын түсінбедім. «Краснодар» шынымен алмай қойды немесе «Қайрат» мен үшін үлкен ақша сұрады. Агенттің айтуынша, алматылықтар ақша сұраған көрінеді. Мені сол кезде «Краснодардың» бірінші емес, екінші командасына шақырды. 

– «Қайраттың» академиясын «Краснодармен» салыстыруға келе ме?

Естуім бойынша, «Қайрат» бұл жағынан «Краснодарға» еліктейді. Сондықтан ресейлік клубтың академиясы мықты деп ойлаймын. «Краснодардың» академиясында болған жоқпын, бірақ алаңдары, жаттығу базасы керемет.