Тигран Барсегян: мен 40 жасқа дейін ойнайтын Роналду емеспін

«Слован Братислава» мен Армения құрамасының жартылай қорғаушысы Тигран Барсегян Қазақстанда ойнаған кездегі естеліктерімен бөлісіп, қазіргі клубындағы жағдайы туралы айтты, деп хабарлайды BorodAbata.kz.

«Қазақстан мен Словакия чемпионаттарын салыстыру қиын. Мен «Қайсар» мен «Астанада» сол қапталда ойнасам, қазір «Слованда» оң қапталда өнер көрсетемін. Алаңдардың сапасын салыстырғым келмейді. Мүмкін Словакия маған ұнап, сол себепті мұнда басқаша ойнаған шығармын. Қартайдым, мансабымды тезірек аяқтауым керек (күлді). Мен 40 жасқа дейін ойнайтын Роналду емеспін».

Футболшының айтуынша, жақында «Слованға» трансфер туралы ұсыныстар түскен, бірақ клуб иесі оны қарастырудан бас тартқан.

«Олар Слованға менің кандидатурам бойынша қоңырау шалып, белгілі бір көлемде ақша ұсынған. Дегенмен клуб иесі мені жақсы көреді және құрметтейді, мені сатқысы келмейтінін айтып, Арменияның Мессиі деп атады», – деді футболшы.

Барсегян екі чемпионаттағы командалардың ойынындағы тактикалық айырмашылықтарды да атап өтті.

«Мен сол қапталда ойнаған кезде, аздап ыңғайсыз болды, өйткені солақаймын. Тактика жағынан да Қазақстан мен Словакиядағы ойындар басқаша болған шығар. Ал қорғаныс жағынан қатты айырмашылық жоқ. Мен «Астана» мен «Слован» сапында ойнаған кезде, бұл клубтар әрқашан жеңіске жетуді қалайтын. Бізде еркін ойнауға мүмкіндік болмады, өйткені қарсыластар көбіне қорғанысқа жатып, қарымта шабуылға иек артады. «Ордабасыда», «Тобылда» және «Қайраттың» құрамында қиындық тудыратын мықты қорғаушылар болды», – деді Барсегян.

Бұған дейін BorodAbata.kz порталы армениялық футболшының «Қайратқа» ауысуға жақын екенін жазған болатын.