Ғалымжан Кенжебек: «Қайраттың» түлегімін, бірақ негізгі құрамда ойнау қиын болды

Қазақстандық шабуылшы Ғалымжан Кенжебек YouTube-тағы BorodAbata арнасына берген сұхбатында Кипр чемпионатының деңгейіне тоқталып өтті және де өзін қай клубтың түлегі ретінде санайтынын айтты.

– Сен қалай адаптациясыз Кипр чемпионатында гол соға бастадың?

Ол жаққа бейімделу оңай болды. Командада орысша сөйлейтін екі жігіт болды. Бас бапкер де орыс, ал оның көмекшісі украиналық азамат болды. Оның үстіне, екінші лигада ойнағандықтан, оңайға соқты. Қазақстан чемпионатымен салыстыруға келмейді. Мен ойнаған «Акритас» клубы Қазақстанда турнирлік кестенің екінші жартысында жүреді.

Кипрдегі «Красава» клубының деңгейі мықты. Жеке клуб болғандықтан, бюджеті де жақсы. Оларға қарсы ойнап, 0:3 есебімен ұтылып қалдық.

– «Красаваның» басшысы Евгений Савинмен сөйлестің бе? Олар көбінесе қазақстандық футболшыларға қызығады ғой.

Жоқ, онымен сөйлеспедім. Ол кезде «Қайратпен» мәселе туындағандықтан, Кипрге кетуге мәжбүр болдым.

– Болашақта ТОП-5 чемпионаттың клубы сенің трансферіңе қыруар қаржы төлесе, бір бөлігі сен түлеп ұшқан академияға түседі. Сен өзіңді қай клубтың түлегі ретінде көресің?

Тараздың тумасымын, бірақ «Қайраттың» түлегімін. Оларға алғыстан басқа айтарым жоқ. Себебі футболдағы жолым сол жақтан басталды. Мен «Қайрат» үшін барымды салдым, олар да мен үшін қолдан келгендерін жасады. Қазір олардың ойындарын жиі қарап тұрамын.

– «Қайраттан» жыл сайын жас таланттар шығып жатады. Ал сен сияқты футболшыларды жібере салды. Бұл олар үшін пайда ма, әлде, зиян ба?

Қазіргі жастары мықты. Дастан Сәтпаевты жақсы білемін. Біздің кезімізде негізгі құрамда ойнау қиын болды. Командада Вагнер Лав, Нұралы Әліп секілді мықтылар жүрді. Ал қазіргі құрамына қарасақ, ойнауға мүмкіндік бар.