Огай – «Жетісудың» техникалық жеңілісі туралы: федерация не үшін керек сонда?

Қазақстандық бапкер Дмитрий Огай BorodAbata.kz сайтына берген сұхбатында ҚФФ-ның «Жетісуға» «Оқжетпеспен» болған ойында техникалық жеңіліс беру туралы шешіміне қатысты пікір білдірді.

«Мұндай жағдайда барлығы клубтың міндеті болып саналады. Кімнің ойнап, кімнің ойнай алмайтынын спорт директоры қадағалап тұруы керек еді. Бірақ бұл федерацияның да міндеті. Мен Ресейдің бірінші лигасында жұмыс істеген кезімде, тіпті ойыншы дисквалификация алса да, әр ойынның алдында бұл ойыншының матчқа қатыса алмайтыны туралы хат келетін. Бұл жерде федерацияның да кінәсі бар – олар мұндай эпизодтарды қалт жібермеу керек. Егер мұны жасамаса, федерацияның не қажеті бар? Өткен жылы ойынға қатысуға құқығы жоқ ойыншының атын жазуға рұқсат бермейтін жүйе болды. Биыл ол неге жоқ?», – деді Огай.

Еске салайық, ҚФФ «Жетісуға» Нұрбол Әнуарбековтың бір турдағы екі матчқа қатысқаны үшін 0:3 есебімен техникалық жеңіліс берді. Қазақстандық шабуылшы алдымен «Жеңісте» жүріп «Қайратқа» қарсы, содан кейін «Жетісу» ойыншысы ретінде «Оқжетпеске» қарсы ойнаған.