Рабиудың агенті: Марио жақында қатарға қосылады – «Ақтөбе» оған сеніп отыр

Марио Рабиудың агенті Арби Лачи жартылай қорғаушының алаңға қашан оралатынын айтып берді. Оның айтуынша, «Ақтөбе» басшылығы футболшымен келісімшартты бұзу нұсқасын қарастырмаған.

«Марионың «Ақтөбемен» әлі бір жарым жылдық келісімшарты бар, сондықтан бәрі дұрыс. Өкінішке орай, жарақаттан кейін Италияда ота жасатуға тура келді, бірақ қазір оның жағдайы жақсы. Осы уақытқа дейін клуб басшылығы Рабиуды қолдады және алғашқы күндегідей сенуін жалғастыруда.

Ол қазір клубқа оралды және жақында алаңға шығады. «Ақтөбеге» ойыншыны осындай сәтте жалғыз қалдырмағаны үшін тағы да алғыс айтқым келеді. Менің ойымша, камбэкке өте аз уақыт қалды», - деді нигериялық футболшының өкілі BorodAbata.kz сайтына берген сұхбатында.

Еске салайық, мамыр айында Рабиуға крест тәрізді байламы үзілген деген диагноз қойылған болатын. Бұған дейін 25 жастағы жартылай қорғаушы команда сапында жеті матч өткізіп, бір нәтижелі пас берген.