Ресейлік эксперт: ренжімеңіздер, бірақ ҚПЛ РПЛ-дан әлсіз

Матч ТВ комментаторы Артем Шмельков «Оренбургтың» Иван Башичті неліктен «Астанаға» жібергенін түсіндірді.

«Ренжімеңіздер, бірақ ҚПЛ РПЛ-дан әлсіз, сондықтан Башич «Астанаға» сай ойыншы. Ол «Оренбургтың» деңгейіне де сай болды. Егер Иван өзінің потенциалын толығымен көрсете алса, әлдеқайда жақсы көрінеді, мен оған осыны тілеймін. Босниялықтың біз жақта аздап жолы болмады.

«Оренбург» оны тегін жібере салды ма? Бұл жерде айтарлықтай ештеңе жоқ: команда жоғарғы дивизионнан түсіп қалды және жалақы қорын азайту туралы шешім қабылдады. Екіншіден, бірінші лигада шетелдік ойыншыларға қатаң шектеу қойылғандықтан, біреу құрбан болуы керек. Бұл Башич әлсіз ойыншы дегенді білдірмейді. «Астана» алаң ортасын жақсылап күшейтіп алды», – деді Шмельков BorodAbata.kz сайтына берген сұхбатында.

Башич РПЛ-да 71 матч өткізіп, тоғыз гол соққан. Босниялық футболшы «Астананың» қазіргі қақпашысы Йосип Чондричпен «Зриньскиде» бірге ойнаған.

Бұған дейін Шмельков Иван Башичтің «Астанаға» ауысуына қатысты өз пікірімен бөліскен болатын.