«Ақтөбе» Ерлановпен келісімшартты ұзарту туралы келіссөздер жүргізуде

«Ақтөбе» Қазақстан құрамасының 33 жастағы қорғаушысы Темірлан Ерлановпен жаңа келісімшартқа отыруға ниетті, деп хабарлайды ASnews.kz.

Футболшының қолданыстағы келісімшарты аяқталды. Клуб басшылығы ойыншыны құрамда сақтап қалуға мүдделі, дегенмен келіссөздер барысында қаржылық шарттарды төмендетуге тырысып жатыр.

Бұл жағдайды қостанайлық «Тобыл» пайдаланып кетуге дайын. Бұған дейін клуб тәжірибелі қазақстандықты қатарына қосуды жоспарлап отырғаны және оған тиімді ұсыныс жасағаны хабарланған болатын.

Өткен маусымда Ерланов барлық додада 28 матчқа қатысып, алты гол соқты және бір нәтижелі пас берді. Қорғаушының трансферлік құны 450 мың еуроны құрайды.

Айта кетейік, футболшының еншісінде Қазақстан ұлттық құрамасының жейдесінде өткізген 23 ойын мен екі голы бар.

Бұған дейін ағылшындық «Саутгемптонның» бұрынғы шабуылшысы Марьян Пахарь «Ақтөбе» клубының спорт директоры лауазымына келуі мүмкін екендігі хабарланды.