Яцек Гуральски «Қайратқа» Луиш Матамен келісімшартқа отыруға көмектескен

Алматылық «Қайрат» пен Польша құрамасының бұрынғы жартылай қорғаушысы Яцек Гуральски португалиялық қорғаушы Луиш Матаның қазақстандық клубқа ауысуына ықпал еткенін мәлімдеді, деп хабарлайды ASnews.kz Kanał Zero-ға сілтеме жасап.

«Заглембеге» қажет болмай қалған Луиш Матаға мен алматылық «Қайратқа» ауысуға көмектестім, ал ол Чемпиондар лигасының топтық кезеңінде мадридтік «Реал» сияқты клубтарға қарсы ойнады. Экстраклассадан кеткен ойыншылар кейін Чемпиондар лигасы үшін таласатын командалардың қатарынан табылып жатады», – деді поляк.

Мата «Қайратқа» любиндік «Заглембеден» 2025 жылдың ақпан айында жалға алу құқығымен ауысып, сол жылдың жазында алматылықтармен толыққанды келісімшартқа отырды. Қазақстанға келмес бұрын футболшы поляк Экстраклассасында щециндік «Погонь» және «Заглембе» сапында өнер көрсетті.

Айта кетейік, Яцек Гуральскидің өзі «Қайрат» намысын 2020–2022 жылдар аралығында қорғаған болатын.