Усман Н’Диайе: қазақстандық футболшылар грузиндерден кем емес, тек оларға мүмкіндік беру керек

Қызылордалық «Қайсар» мен молдовалық «Шерифтің» бұрынғы қорғаушысы, қазір Францияның «Сенте-Женевьева» клубында өнер көрсететін Усман Н'Диайе BorodAbata.kz сайтына берген сұхбатында қазақстандық футболшылардың потенциалы туралы пікірімен бөлісті.

«Мен мұны біраз уақыттан бері айтып жүрмін: жас қазақстандық футболшыларға сапалы жаттықтырушылар керек. Олардың дене бітімдері тамаша – мықты, төзімді, жекпе-жекке дайын. Мен екі-үш жас және болашағынан зор үміт күттіретін жігіттерді білемін. Солардың бірі – Елжас Сарбай. Оларда жақсы жаттықтырушылармен тактикалық тұрғыда тұрақты жұмыс істеуге мүмкіндік болса, жоғары деңгейге көтерілер еді.

«Жергілікті футболшылар жаман емес. Керісінше, олар өсіп, күрескісі келеді, жауынгерлік рухы бар. Егер оларда Владимир Никитенко сияқты адам жұмыс істесе және футболшыларға өздерін көрсетуге мүмкіндік берілсе, олар «Манчестер Ситиге» ауысқан Абдуқодир Хусанов сияқты жетістікке жететін еді. Сол кезде Еуропаның топ-чемпионатында ойнайтын қазақстандық ойыншылардың саны артады», – деді Н’Диайе.

Сенегалдық легионер Қазақстан мен Грузия футболының даму жолын да салыстырды:

«Қазақстандық ойыншылар грузиндерден кем емес. Бірақ қазір Грузия ұлттық құрамасында шетелдік жаттықтырушы, ал клубтарында еуропалық мамандар жұмыс істейді. Олар не істеу керектігін көрсетеді және басқаша жұмыс істейді. Нәтижесінде Кварацхелия ПСЖ-да, Давиташвили «Сент-Этьенде» жүр, Мамардашвили жақында «Ливерпульге» ауысты. Бірақ Грузия Қазақстанмен салыстырғанда әлдеқайда кішкентай ел. Олардың қолынан келген дүниені сендер де жасай аласыңдар. Тек көп нәрсені өзгерту керек».

Франциялық «Лионның» түлегі Усман Н'Диайе 2021 жылы «Қайсар» сапында ойнап, Премьер-лигада 25 матч өткізген.