«Целенің» спорт директоры – Эдмилсон жайлы: оған темірдей жүйке керек

Словениялық «Целе» клубының спорт директоры Геннадий Голубин BorodAbata.kz сайтына берген сұхбатында бразилиялық шабуылшы Эдмилсонның «Қайрат» сапындағы ойынына қатысты пікір білдірді. Футболшы алматылық клубқа маусым айында ауысты, бірақ әзірге сынның астында жүр.

«Қайрат» «Целеге» қарағанда мүлдем басқа футбол ойнайды, сондықтан Эдмилсон жаңа талаптарға, жаңа елге және жаңа чемпионатқа бейімделуі керек. Ол классикалық шабуылшы, баспен жақсы ойнайды, әсіресе айып алаңының ішінде. Чемпионатты сезініп, ырғағы мен талаптарын түсінсе, бәрі ойдағыдай болады», - дейді маман.

Голубиннің айтуынша, футболшы Словениядағы маусым аяқталғаннан кейін демалмаған екен:

«Көптеген ойыншылар демалыста болды, бірақ ол үзіліс алмады: «Целеде» бір маусым ойнап, бірден Қазақстанға көшті, жаттығу жасап, матчтарға қатыса бастады. Тіпті демалып үлгерген жоқ. Бұлай жұмыс істеу үшін сіздің жүйкеңіз темірден жаралуы тиіс. Бірақ ол әлі де голдарын топырлатып соғады, мен оған сенімдімін», – деді Голубин.

Эдмилсон соңғы екі маусымды Словенияның «Целе» клубында өткізіп, чемпион және ел кубогының жеңімпазы атанды. УЕФА Конференция лигасының соңғы маусымында барлық 12 матчқа қатысып, команданың ширек финалға шығуына көмектесті. Бразилиялық шабуылшы словениялық клуб сапында 73 ойын өткізіп, 19 гол соққан, 8 нәтижелі пас берген.

Бұған дейін белгілі қазақстандық бапкер Дмитрий Огай Эдмилсонның КуПС-ке қарсы матчтағы ойыны туралы пікірін білдірген болатын.