Исламханның экс-бапкері – футболшының «Астанаға» ауысуы туралы: Бауыржан тағы бес жыл ойнап береді

Бауыржан Исламханның Тараздағы алғашқы бапкерлерінің бірі Рахмон Ұстабаев BorodAbata.kz сайтына берген сұхбатында жартылай қорғаушының «Астанаға» ауысуына қатысты пікір білдірді.

«Біріншіден, Бауыржанның үлкен футболға қайта оралып жатқанына өте қуаныштымын. Ол сияқты футболшыларға сұраныс көп. Әрине, басында қиын болады – алдымен допинг қолданғаны үшін футболдан шеттетілді, кейін бірқатар жарақаттар болды. Бәрі де, Алланың қалауымен екенін естен шығармайық. Оның «Астанаға» көмектесетіні анық. Бауыржан секілді футболшылар «Астана» болсын, «Аль-Айн» болсын, кез келген командада көшбасшы рөлін атқарады», – деді Ұстабаев.

Маманның айтуынша, Исламханның «Астанаға» оралуы оның мансабының аяқталуын емес, жаңа қадам жасағанын білдіреді.

«Бұл трансфер ол үшін трамплин болады. Бауыржан мұнымен тоқтап қалмайды – мен оны бұрыннан білемін, ол менің қол астымда 13 жастан 16 жасқа дейін жаттығу жасады. Содан кейін «Тараздың» дубліне түсті. Ол ешқашан берілмейтін және әрқашан соңына дейін баратын адам. Бауыржанның әлі уақыты бар – қазір 32 жаста, тағы бес жыл жоғары деңгейде ойнап береді».

2025 жылғы маусымның басында Қазақстан құрамасының бұрынғы капитаны «Тұранмен» келісімшартқа отырған еді, бірақ жарақатына байланысты бірде-бір матчқа шықпады. Бір күн бұрын Исламханның елордалық «Астанамен» ағымдағы маусымның соңына дейін келісімшартқа отырғаны белгілі болды.

Бұған дейін Ұстабаев Бақтиер Зайнутдиновтың Ресей Премьер-лигасына қайта оралуы мүмкін екенін айтқан болатын.