«Қолдарына допинг салып берген жоқ қой»: комментатор «Ордабасының» «Тобылды» ынталандыруы туралы

Қазақстандық спорт комментаторы Дидар Есемов шымкенттік «Ордабасы» басшылығының ҚПЛ-дың 26-турында алматылық «Қайратқа» қарсы сырт алаңдағы матч алдында «Тобылды» қаржылай ынталандырғаны туралы ASnews.kz ақпаратына пікір білдірді.

«Тобыл» бір ерекше мотивациямен алаңға шықты. ASnews.kz ақпараты бойынша, «Ордабасы» басшылығы «Тобылға» мотивация берді. Бұл туралы не ойлаймын? Қарсыласқа мотивация болғанда, тікелей өз қарсыласына емес, басқа үшінші командаға мотивация етсе, оның ештеңесі жоқ. Чемпиондық таласта бұл болатын зат. Ойыншылардың қолдарына допинг салып берген жоқ қой. «Тобылға» бұл ойында ештеңе керек емес. Олар ұшып та кетпейді, еурокубокқа да таласпайды», – деді Есемов Fonteam подкастында.

Еске сала кетейік, өткен турда «Тобыл» Алматыда «Қайратты» 4:1 есебімен сенсациялық түрде тас-талқан етті. Бұл нәтиже қостанайлықтарға алматылық клубтың бәсекелестерінен ірі көлемде қаржылай бонус әкелді.

Қонақтар сапынан Урош Милованович дубль авторы атанса, Виталий Лисакович пен Луис Герра тағы бір-бір голдан соқты. Алаң қожайындарының жалғыз добын Марк Гуаль енгізді.

Тур қарсаңында «Ордабасы» басшылығы сол сәтте шымкенттіктерден екі ұпайға озып тұрған «Қайратпен» тең түскен немесе оларды жеңген жағдайда «Тобыл» ойыншыларына қомақты сыйақы беретіні туралы ақпарат тараған болатын.

Алматыдағы сенсация чемпиондық атақ үшін таластағы жағдайды түбегейлі өзгертті. «Астананы» (1:0) жеңгеннен кейін «Ордабасы» 58 ұпай жинап, бірінші орынға қайта жайғасты. «Қайрат» (57 ұпай) екінші сатыға төмендеді. Ал «Тобыл» (34 ұпай) ірі жеңісінің арқасында жетінші орынға табан тіреді.

«Тобыл» «Қайратты» жеңгені үшін «Ордабасыдан» миллиондар алады