«Тобыл» «Қайратты» жеңгені үшін «Ордабасыдан» миллиондар алады

Қостанайлық «Тобыл» Қазақстан премьер-лигасының 26-туры аясындағы матчта алматылық «Қайратты» сырт алаңда 4:1 есебімен сенімді түрде жеңді. Бұл нәтиже қостанайлықтарға алматылық клубтың чемпиондық таластағы бәсекелестерінен ірі қаржылық бонус әкеледі, деп хабарлайды ASnews.kz.

Бірінші таймда «Тобылдың» сербиялық шабуылшысы Урош Милованович пенальтиді дәл орындап, есеп ашты. Алаң қожайындары бұған испаниялық шабуылшы Марк Гуальдің голымен жауап қатты. Алайда үзіліске дейін Милованович дубль авторы атанып, қонақтарды қайтадан алға шығарды. Кездесудің екінші жартысында Виталий Лисакович «Қайрат» қақпашысы Темірлан Анарбековтің шығу кезіндегі қателігінен кейін допты баспен торға түсіріп, қостанайлықтардың басымдығын арттырды. Матчқа «Тобыл» вингері Луис Герра нүкте қойды – 4:1.

ASnews.kz ақпаратына сәйкес, тур қарсаңында шымкенттік «Ордабасы» басшылығы осыған дейін оңтүстіктерден екі ұпайға озып тұрған «Қайратпен» тең түскен немесе оларды жеңген жағдайда «Тобылға» қомақты сыйақы ұсынған.

Алматыдағы сенсациялық нәтиже чемпиондық атақ үшін таластағы жағдайды түбегейлі өзгертті. «Астананы» (1:0) жеңіп, басты бәсекелесі сүрінгеннен кейін «Ордабасы» 58 ұпай жинап, чемпионаттың бірінші орнына қайта жайғасты. «Қайрат» 57 ұпаймен екінші сатыға төмендеді. Ал «Тобыл» сырт алаңдағы ірі жеңісінің арқасында турнирлік кестеде 34 ұпаймен жетінші орынға көтерілді.

«Бұйрықтан» қорықты»: блогер «Астана» көшбасшыларының неге ойнамағанын түсіндірді