«Айтқаны– сандырақ, ұят болу керек»: Уразбахтин Бабаянға жауап берді

Алматылық «Қайраттың» бас бапкері Рафаэль Уразбахтин «Тобылдан» ұшыраған жеңілістен (1:4) кейінгі баспасөз мәслихатында «Астана» бапкері Григорий Бабаянның мәлімдемесіне қатаң реакция білдіріп, елордалық клубтың матч кестесіне қатысты өтініштен бас тартқаны туралы айтты, деп хабарлайды ASnews.kz.

– Рафаэль Радикұлы, әріптесіңіз Григорий Бабаян сары қағаз алып қалудан қауіптеніп, екі ойыншыны сақтап қалғанын айтты. Ал сіздердің «Тобылға» қарсы матчтағы құрамда бұған дейін үш сары қағазы бар Эдмилсон мен Александр Мартынович алаңға шықты. Неліктен сіз осындай сақтап қалу тактикасын ұстанбадыңыз?

– Иә, менің бұл туралы естігенім бар. Шынымды айтсам, бұл – сандырақ. Бұл сөздерге таңғалдым. Адамның мұндай нәрсені айтуы мен үшін оғаш көрінеді. Бұған пікір білдірмей-ақ қояйын. Менің ойымша, ең бастысы – өмірде дұрыс бағытпен жүру. Ар-ұжданмен өмір сүріп, адам қалпыңда қалу маңызды. Бәріміз де пендеміз. Жетістікке түрлі жолмен жетуге болады, бірақ өзіңмен оңаша қалғанда, өмірде жасаған істерің үшін ұялмауың керек. Егер мұны адал жасасаң... Бәріміз осыған ұмтылуымыз қажет.

– Келесі «Астанаға» қарсы ойынға төрт күннен аз уақыт қалды. Оның үстіне қарсыласта дайындыққа артық бір күн болды. Бұл оларға басымдық бере ме?

– Біз «Астанадан» матчты бір күнге шегеруді сұрадық, бірақ олар бас тартты. Қорытындысын өздеріңіз жасаңыздар. Біз спорттық жағымен айналысамыз.

Еске сала кетейік, «Астана» бапкері Григорий Бабаян сары қағаз санын асырып алу қаупіне байланысты «Ордабасыдан» (0:1) жеңілген матчта Марин Томасов пен Иван Башичті сақтап қалған еді. Блогер Рымбек Ізғалидің пікірінше, елордалықтардың бапкері команданың көшбасшыларына әдейі сары қағаз беру туралы «Алматыдан түсетін «бұйрықтан» қорыққан».

«Астана» мен «Қайрат» арасындағы аса маңызды матч 17 қыркүйекте елордада өтеді. Қазіргі таңда ҚПЛ-да «Ордабасы» (58 ұпай) көш бастап тұр, алматылық «Қайрат» екінші сатыда (57 ұпай), ал «Астана» үшінші орынға жайғасқан (45 ұпай).

«Бұйрықтан» қорықты»: блогер «Астана» көшбасшыларының неге ойнамағанын түсіндірді