«Бұйрықтан» қорықты»: блогер «Астана» көшбасшыларының неге ойнамағанын түсіндірді

Футбол блогері Рымбек Ізғали Қазақстан премьер-лигасының 26-турында шымкенттік «Ордабасыдан» сырт алаңда ұшыраған жеңілістен (0:1) кейін елордалық «Астананың» бас бапкері Григорий Бабаянмен болған әңгіменің мән-жайымен бөлісті, деп хабарлайды ASnews.kz.

Автор матчтан кейінгі баспасөз мәслихатында Бабаянға негізгі ойыншылар – Марин Томасов пен Иван Башичтің алаңға шықпау себептері туралы әдейі өткір сұрақтар қойғанын айтты. Ізғалидің сөзінше, әңгіме стадион көгалында жалғасқан, бапкер оған алаңның сапасын көрсету үшін сол жерге алып шығыпты.

Бапкердің журналистерге айтқан ресми жауабы – ойыншылар матчтың алғашқы минуттарында-ақ сары қағаз алып қалу қаупіне байланысты алаңға шықпаған. Алайда блогер өз қорытындысын жасады.

«Ұққаным, Бабаян Алматыдан «әмір» түсіп, бірден сары алады деп қорыққан. Анық айтпады, бірақ қитұрқы сұрақтарыммен өзімше шығарып алғандай болдым», – деп жазды Ізғали.

Турнирлік жағдай мен елдің бірнеше дүркін чемпиондарының жеңілісіне пікір білдірген блогер кеңестік идеологиялық «Бандыны қуған Хамит» (1979 жыл) фильміндегі жағымсыз кейіпкер атаман Құдіренің сөзін мысалға келтірді.

«О тоба, «Астананың» дәрменсіздігін көру біртүрлі екен. Құдіренің «үкіметтің жылағанын көрсем, рақаттанам» дегені есіме түсіп кетті», – деп түйіндеді автор.

«Астананың» бапкерлер штабы 17 қыркүйекте өтетін алматылық «Қайратқа» қарсы аса маңызды үйдегі ойын алдында сары қағаз санын асырып алу қаупіне байланысты Шымкентте Томасов пен Башичті сақтап қалған.

Жасұлан Әмірдің голының арқасында «Ордабасының» жеңіске жетуі клубқа 58 ұпай жинап, турнирлік кестеде бірінші орынға шығуға мүмкіндік берді. «Қайрат» (57 ұпай) екінші сатыға төмендеді, алайда оларда бір матч бар. «Астана» тур қорытындысы бойынша үшінші орында қалды.

«Сапа жетіспеді»: Абагна – «Астананы» жеңгені және мүлт кеткен мүмкіндіктер туралы