«Сапа жетіспеді»: Абагна – «Астананы» жеңгені және мүлт кеткен мүмкіндіктер туралы

Шымкенттік «Ордабасының» жартылай қорғаушысы Давид Абагна ASnews.kz сайтына берген сұхбатында Қазақстан премьер-лигасының 26-турында елордалық «Астананы» өз алаңында жеңген (1:0) ойынға пікір білдіріп, мүлт кеткен мүмкіндіктерін түсіндірді және жанкүйерлерге қолдауы үшін алғыс айтты.

– Давид, өте маңызды жеңіспен құттықтаймыз. «Астанаға» қарсы ойын қаншалықты ауыр болды?

– Рақмет. Ең алдымен, осы жеңіс үшін Жаратқанға алғыс айтамыз. «Астана» – лигадағы ең үздік әрі ең үлкен командалардың бірі. Әрине, бұл өте ауыр тартыс болды. Өзің сияқты жақсы футбол көрсететін қарсыласқа қарсы шыққанда әрқашан қиындықтар туындайды. Бірақ біз аянбай жұмыс істедік және соңында үш ұпай еншілегенімізге қуаныштымыз.

– Бүгін де, өткен матчта да сізде гол соғатын тамаша мүмкіндіктер болды. Гол соғуға не жетпеді – жай ғана жолыңыз болмады ма?

– Иә, бұл жай ғана сәтсіздік дер едім. Немесе шабуылды аяқтауда шеберлік пен сапа аздап жетіспеген шығар. Бірақ уақыт өте келе, жұмысты жалғастыра отырып, мұндай эпизодтарда тиімдірек әрі мінсіз ойнаймыз деп ойлаймын.

– Лыр лық толған трибунадағы бүгінгі атмосфераны қалай бағалайсыз? Команданың өз алаңында бір ғана ойыны қалды, қалғандары сыртта өтеді.

– Әрқашан айтып жүргенімдей, жанкүйерлерімізге, қаламызға және осы керемет жандардың барлығына алғыс айтамыз. Олар стадионға үнемі келіп, біз үшін ғажайып атмосфера сыйлайды. Оларға тек шексіз алғыс айта аламыз. Олардың әрқашан біздің артымызда тұрғанын білеміз, қолдауын сезінеміз және бұл бізге өте үлкен көмек береді.

Еске сала кетейік, Шымкенттегі Орталық стадионда өткен 26-тур матчы «Ордабасының» «Астананы» 1:0 есебімен жеңуімен аяқталды. Кездесу тағдырын 78-минутта Жасұлан Әмірдің дәл соққысы шешті.

Бұл жеңіс шымкенттік клубқа 58 ұпай жинап, турнирлік кестеде бірінші орынға шығуға мүмкіндік берді. «Қайрат» (57 ұпай) екінші сатыға төмендеді, алайда оларда бір матч бар. «Астана» тур қорытындысы бойынша үшінші орында қалды.

«Жақсы реакция таныттық»: «Ордабасының» румыниялық легионері «Астананы» жеңгені туралы