«Қақпада ойнауға да дайынмын»: Луиш Мата позициясын өзгертуі мен «Қайраттың» көш бастауы туралы

Алматылық «Қайраттың» португалиялық қорғаушысы Луиш Мата ASnews.kz сайтына берген сұхбатында алаңдағы жаңа рөлін, команданың сәтті сериясын және ҚПЛ турнирлік кестесінің шыңына қайта оралуын бағалады.

«Мен үшін ең бастысы – командаға көмектесе алуым. Сол қапталдағы вингер ретінде өзімді жақсы сезінемін. Әрине, менің негізгі позициям – сол қапталдағы қорғаушы, бірақ бапкер мені жоғарырақ шығарады. Мен алаңда бар күшімді саламын. Тіпті қақпада ойнау керек десе де (күледі), әр позицияда барынша тырысамын, сондықтан көмектесе алатыныма қуаныштымын. Ең бастысы – чемпионатта қатарынан 10 рет жеңіске жеттік. Енді біз осы қарқынды жалғастырып, қарапайымдылық сақтауымыз керек», – деді ойыншы.

Португалиялық футболшыдан кетіп қалған Дастан Сәтпаевтың нәтижелілігін алмастыруға тырысып жатқан-жатпағанын сұрағанда, ол жымиып жауап берді:

«Жоқ-жоқ-жоқ (күледі), әрбір ойыншы бірегей. Мен гол соға алатыныма сөзсіз қуаныштымын. Бірақ ең бастысы, айтып өткенімдей, «Қайраттың» жеңіске жете беруі. Гол соғамын ба, жоқ па, ол маңызды емес, мен бұл туралы ойланбаймын. Өткен жылы мен бірде-бір гол соқпадым және бұған бола алаңдамаймын. Мүмкіндік туғанда гол соғу әрқашан жақсы, бұл керемет сезім. Атмосфера тамаша, біз қарапайымбыз және біз біртұтаспыз. Біз бірінші орында тұрмыз, бірақ алдағы матчтардан басқа ештеңе туралы ойламаймыз».

Алдағы «Тобылмен» болатын кездесу мен тығыз кесте туралы айта келе, Мата команданың жүктемелерге дайын екенін атап өтті:

«Біз тығыз кестеге үйреніп қалдық. Жаз бойы аптасына екі матчтан ойнадық. Қазір «Тобылға» дайындалуға бірнеше күніміз бар, біз соған назар аудардық. Алда екі ойын, содан кейін үлкен үзіліс болады. Олардың командасы мықты болғандықтан, бұл шынымен де ауыр матч болады. Біз бар күшімізді салып, алға ұмтылуды жалғастыруымыз керек.

Конференция лигасы ма? Шынын айтқанда, бұл туралы сөйлесетін уақытымыз әлі болады. Әрине, іріктеуден өткенімізге қуаныштымыз. Қазақстан мен «Қайратты» сол жақта таныстырғанымызға мақтанамыз. Қазір біздің ойымыз чемпионаттағы келесі матчтарда болуы керек; әрине, Конференция лигасының матчтары келген кезде, бұл туралы да сөйлесеміз», – деді Мата.

Еске сала кетейік, 21-турдың кейінге қалдырылған матчында қазіргі чемпиондар астаналық «Жеңісті» 3:0 есебімен сенімді түрде жеңді. Матчтағы есепті 20-минутта Лев Кургиннің пасын голға айналдырған бразилиялық Эдмилсон ашты. Екінші таймда алаң ортасынан қашып шыққан испаниялық Марк Гуаль басымдықты еселесе, 86-минутта Луиш Матаның өзі Азамат Тұяқбаевтың пасынан кейін кездесуге нүкте қойды.

Осы жеңістің арқасында маусымның аяқталуына алты тур қалғанда алматылықтар шымкенттік «Ордабасыны» екі ұпайға басып озып, ҚПЛ жарыс кестесінің көш басына қайта оралды.

«Бірінші орынға лайықпыз»: Лукас Африко «Қайраттың» чемпиондық жарысы туралы