«Бірінші орынға лайықпыз»: Лукас Африко «Қайраттың» чемпиондық жарысы туралы

Алматылық «Қайраттың» бразилиялық қорғаушысы Лукас Африко ASnews.kz-ке берген сұхбатында «Жеңісті» (3:0) тізе бүктірген ойынды және «Ордабасымен» арадағы чемпиондық жарысты бағалады.

Өзінің физикалық жағдайын бағалай келе, бразилиялық ойыншы шешуші кезеңде командаға көмектесуге толық дайын екенін атап өтті:

«Мен қайтадан толық матчтар өткізуге дайынмын. Ахилл сіңіріне аздап күш түсіп, қабыну болған еді, бірақ біз мұны емдеп жаздық, қазір мен қатардамын. Командаға көмектесуге толық дайынмын».

Сондай-ақ қорғаушы алматылықтардың ҚПЛ-дағы қазіргі көшбасшылығы мен жеңісті сериясы туралы пікір білдірді:

«Біз өте жақсы маусым өткізіп жатырмыз, қатарынан 10 рет жеңіске жетіп, тарих жаздық. Біз бірінші орында тұруға әбден лайықпыз, бірақ алда бізді алты финал күтіп тұр. Бірінші орнымызды сақтап қалу үшін барынша зейін қоюымыз керек.

«Тобылға» қарсы ойын алдында қалыпқа келуге уақытымыз аз. Бірақ біз кәсіпқой ойыншылармыз және келесі матчқа дайын болуымыз қажет. «Тобылдың» мықты команда екенін білеміз. Дегенмен, әдеттегідей, біз алаңға тек жеңіс үшін шығамыз.

Конференция лигасының іріктеу кезеңінде жақсы жолдан өттік. Енді жалпы кезеңде бізді көптеген мықты қарсыластар күтіп тұр. Әрине, біз плей-оффқа шыққымыз келеді және осы кезеңге жеткенімізге өте қуаныштымыз. Бірақ қазір бар назарымыз чемпионатқа аударылған. Конференция лигасы туралы сәл кейінірек ойланатын боламыз», – деп қорытындылады ойыншы.

Еске сала кетейік, 21-турдың кейінге қалдырылған матчында қазіргі чемпиондар астаналық «Жеңісті» сенімді түрде ұтты. Есепті 20-минутта бразилиялық Эдмилсон ашты. Екінші таймда испаниялық Марк Гуаль басымдықты еселесе, 86-минутта португалиялық Луиш Мата Азамат Тұяқбаевтың пасынан кейін ойынның соңғы нүктесін қойды – 3:0.

Осы жеңістің арқасында маусымның аяқталуына алты тур қалғанда алматылықтар шымкенттік «Ордабасыны» екі ұпайға артта қалдырып, жарыс кестесінің көш басына қайта оралды.

«Конференция лигасы емес, чемпионат маңыздырақ»: Оксанен «Қайраттың» көш бастауы туралы айтты