«Ойынды төңкердік»: «Оқжетпес» қорғаушысы Лотоцкий – «Ордабасымен» өткен матч туралы

Көкшетаулық «Оқжетпестің» украиндық қорғаушысы Борис Лотоцкий ASnews.kz сайтына берген сұхбатында ҚПЛ-дің 25-турында чемпионат көшбасшысы шымкенттік «Ордабасыны» (2:1) сенсациялық түрде жеңгеннен кейінгі әсерімен бөлісті.

Көкшетаулықтардың қорғаушысы команданың мінезін, стадиондағы керемет атмосфераны атап өтіп, еуропалық грандтардың комбинацияларын еске түсірген пенальти кезіндегі әдістің сырын ашты.

Эмоциялар мен матчтағы бетбұрыс туралы

«Эмоциялар шектен тыс керемет. Өздеріңіз бәрін көрдіңіздер. Біз сеніп қана қоймай, ойынды бұрып, үш ұпайды алуға ұмтылдық. Атмосфера тамаша болды, осындай перформанс көрсеткен жанкүйерлерімізге алғыс айтамын. Әр матч сайын жақсара түскіміз келеді, ал мұндай жанкүйерлермен бұл мүмкін болып отыр».

Пенальти кезіндегі құпия әдіс туралы

Лотоцкий командаласы Нұрғайни Бөрібаевтың сөзін растап, 11 метрлік айып добы алдындағы тактикалық қулық алдын ала мұқият ойластырылғанын жеткізді:

«Пенальти сәті? Бұл – үйде дайындаған әдіс. ПСЖ-ның қалай пенальти тебетінін өздеріңіз де көрген шығарсыздар. Бәрі біз қалағандай болғанына шүкір».

Өміртаевтың жоқтығы туралы

Қорғаушы маңызды матч алдындағы команданың кадрлық шығындарына да тоқталды:

«Өміртаевтың жоқтығы? Ол байқалады әрине, бірақ оның орнына шыққан жігіттер ешбір жағынан кем түскен жоқ. Олар өз жұмыстарын барынша атқарды. Бізде құрамды күшейтетін немесе әлсірететін ойыншылар болып бөліну жоқ. Барлығы алаңда бар күшін салады».

Қазақстан премьер-лигасының 25-турында көкшетаулық «Оқжетпес» өз алаңында шымкенттік «Ордабасыны» 2:1 есебімен жеңді. Кездесу барысында Бьорн Йонсен соққан голдан кейін қонақтар алға шыққанымен, алаң иелері Нұрғайни Бөрібаевтың пенальтиі (әріптесі допты қорғап қалған қулық) арқасында есепті теңестіріп, Леонарду Де Ассунсаудың дәл соққысынан кейін жеңісті жұлып алды.

Бұл табыс «Оқжетпеске» 42 ұпай жинап, турнир кестесінде елордалық «Астанамен» теңесуге мүмкіндік берді. Көшбасшыны жеңгені үшін клуб демеушілері командаға жалпы сомасы 24 миллион тенге сыйақы бөлді.

Сенсация үшін 24 миллион тенге: демеушілер «Оқжетпес» ойыншыларын «Ордабасыны» жеңгені үшін марапаттады

«Еуропадағыдай жасадық»: Бөрібаев «Ордабасыға» қарсы матчтағы пенальтидің құпиясы туралы

«Төрешілікке шағымданатын олар емес»: Алюетов – «Ордабасыны» жеңгені және хейтерлер туралы